भारतीय विदेश सचिव विनयमोहन क्वात्राको नेपाल भ्रमण तय भएदेखि नै उनले निर्वाचनपछि गठन भएको नयाँ सरकारका प्रधानमन्त्री पुष्पकमल दाहाल प्रचण्डलाई भारत भ्रमणको निम्तो दिने अनुमान गरिएको थियो ।
तर दुई दिने भ्रमणका लागि काठमाडौं आएका भारतीय विदेश सचिव क्वात्राले सोमबार बेलुका नै प्रधानमन्त्रीको सरकारी निवास बालुवाटारमा भएको भेटघाटका क्रममा प्रचण्डलाई भारत भ्रमणको औपचारिक निम्तो भने दिएनन् । यद्यपि, भ्रमणको लागि अनुकुल समयका विषयमा भने छलफल भएको छ ।
‘उहाँले प्रधानमन्त्रीको भ्रमणका लागि समय कहिलेसम्म मिल्नसक्छ भन्ने विषयमा चासो राख्नुभयो’, स्वकीय सचिव मल्लले भने, ‘त्यसका लागि यताको समय पनि मिल्नुपर्ने हुन्छ । हाम्रो समय अनुकुलतालाई हेरेर निम्तो दिने उहाँहरूको तयारी होला ।’
भारतीय दूतावास स्रोतका अनुसार पनि अहिले नै औपचारिक भ्रमणको निम्तो दिने अवस्था बनिनसकेको बुझाइ भारतीय सत्ता पक्षको छ । नेपालमा २५ फागुनका लागि तय भएको राष्ट्रपति निर्वाचन र त्यसको परिणामले सत्ता समीकरणमा प्रभाव पर्नसक्ने भन्दै प्रधानमन्त्री प्रचण्डलाई निम्तो दिन हतार नगर्ने मनस्थितिमा भारत पुगेको हो ।
‘यहाँको सरकारकै सुनिश्चितता छैन, निम्तो मात्रै दिएर के गर्ने ?,’ दूतावास स्रोतले भन्यो, ‘राष्ट्रपतिको निर्वाचनसँगै यहाँको सत्ता राजनीति नै फेरियो भने निम्तो मात्रै दिएर हुँदैन । त्यसका लागि समय परिपक्व बनिसकेको छैन ।’
निम्तो दिए पनि नदिए पनि प्रधानमन्त्रीको राजनीतिक भ्रमण भारतबाटै सुरु हुनेमा भारतीय पक्ष ढुक्क छ । ‘अहिलेसम्मको परम्परा र प्रचण्डजी स्वयंले पनि घोषणा गरिसक्नु भएकाले प्रधानमन्त्रीको पहिलो भ्रमण त भारतबाट हुन्छ भन्नेमा कुनै शंका छैन । तर कहिले भन्ने मात्रै हो,’ स्रोतले भन्यो ।
प्रचण्डले प्रधानमन्त्री नियुक्त भएलगत्तै भारतीय सञ्चार माध्यमलाई अन्तर्वार्ता दिने क्रममा आफ्नो पहिलो विदेश भ्रमण भारतबाटै हुने बताएका थिए ।
क्वात्राको उच्चस्तरीय भेटघाट
नेपाली समकक्षी परराष्ट्रसचिव भरतराज पौड्यालको मैत्रीपूर्ण निमन्त्रणामा क्वात्रा दुई दिने भ्रमणका लागि सोमबार बिहान नेपाल आएका हुन् । उनी त्रिभुवन अन्तर्राष्ट्रिय विमानस्थल ओर्लेलगत्तै होटल याक एण्ड यती पुगेका थिए । त्यहाँ दुईपक्षीय सचिवस्तरीय बैठक बसेको थियो ।
बैठकमा सचिवद्वय पौड्याल र क्वात्राले नेपाल र भारतबीचको बहुआयामिक सहकार्यका विविध पक्षबारे छलफल गरे । सो अवसरमा उनीहरूबीच कनेक्टिभिटी, ऊर्जा व्यापार, कृषि, स्वास्थ्य, संस्कृतिलगायत द्विपक्षीय सहयोगका विविध विषयमा छलफल भएको मन्त्रालयले जनाएको छ ।
उनले आजै राष्ट्रपति विद्यादेवी भण्डारीसँग शीतल निवास पुगेर भेट गरे । त्यसअघि परराष्ट्रमन्त्री डा. विमला राई पौड्यालसँग मन्त्रालयमा भेटवार्ता गरेका थिए । उनले आजै कांग्रेस सभापति शेरबहादुर देउवा, नेकपा एमालेका अध्यक्ष केपी ओलीसँग पनि भेट गरेका छन् ।
उनी अपरान्ह पशुपतिनाथ मन्दिर समेत पुगेका थिए । क्वात्राले मंगलबार पनि राजनीतिक भेटघाटलाई निरन्तरता दिएर अपरान्ह नयाँ दिल्ली फर्किने कार्यक्रम रहेको छ । उनले लोसपा अध्यक्ष महन्थ ठाकुर, जसपा अध्यक्ष उपेन्द्र यादव र जनमत पार्टीका अध्यक्ष सीके राउतसँग पनि भेट गर्ने जनाइएको छ ।
Comments are closed.